د صنعت او سوداګرۍ وزارت وایي چې د تېر کال اتو میاشتو پرتله د سږ کال په اتو میاشتو کې بهر ته د جلغوزې صادرات نسبتاً زیات شوي دي. 

د دغه وزارت معلومات ښيي چې، د روان لمریز کال په تېرو اتو میاشتو کې چین، هند، پاکستان، متحده عربي اماراتو او امریکا ته د ۱۴ مېلیونه ډالرو په ارزښت جلغوزې صادرې شوې دي.

د صنعت او سوداګرۍ وزارت ویاند، اخندزاده عبدالسلام جواد د هوایي دهلیزونو او ځمکې له لارې د جلغوزې د صادراتو لپاره د اسانتیاوو له رامنځ ته کولو سره په ټینګار وايي: « په تېرو اتو میاشتو کې د جلغوزې صادرات د ۱۴ مېلیونه ډالرو په ارزښت وو، چې ډېری یې چین، هند، پاکستان، متحده عربي اماراتو، سعودي عربستان، قطر، امریکا، انګستان، اسټرالیا، هالنډ او نورو هېوادونو ته صادر شوې دي.»

یو شمېر سوداګر بیا وايي، بهر ته د جلغوزې د صادراتو د زیاتوالي لپاره اړتیا ده چې اسلامي امارت د سوداګرو ستونزو ته هم رسېدنه وکړي او د جلغوزې پروسس په کور دننه وشي.

سوداګر، زلمي عظیمي وویل: « د اسلامي امارت له مشرانو څخه هیله کوم چې هر څومره ژر چې کېږي، هوایي دهلیزونه فعال کړي، تر څو وکوالی شي خپله وچه مېوه په صحي توګه پر خپل وخت نړۍوال مارکیټ ته ورسوو.»

د سوداګرۍ او پانګونې خونه بیا وايي افغانستان په کال کې د ۱۰۰ مېلیونه ډالرو په ارزښت د جلغوزې د صاداراتو ظرفیت لري او باید په دې برخه کې جدي پام وشي.

د سوداګرۍ او پانګونې خونې د مدیره پلاوي غړي، خان‌جان الکوزي په دې اړه څرګندوی: « سږ کال تر ۳۰ مېلیونه ټنو د تولید امکان شته او تر ۳۰ زرو زیات هم تولید او پروسس کېدای شي. اوس مهال موږ ۵ څخه تر ۶ ټنو صادرات لرو او هغه هم چین او ځینو نورو اروپایي هېوادونو ته دي.»

د صنعت او سوداګرۍ وزارت د ورکړ شویو معغلوماتو له مخې، په ۱۴۰۱ هجري لمریز کال کې د ۴۹ مېلیون ډالرو په ارزښت جلغوزه بهر ته صادره شوې چې ډېری صادارات یې پاکستان، چین او هند ته شوي دي.