د ریاست الوزرا اداري مرستیال د هېواد د کرنیزو محصولاتو په نهه ویشتم نندارتون کې وایي، چې اوسمهال د هېواد ۸۰ سلنه کاري ځواک د کرنې په برخه کې په کار بوخت دی.

عبدالسلام حنفي زیاتوي، چې کرنیز محصولات د هېواد د کورني ناخالص تولید له ۲۱ تر ۳۳ سلنې برخه جوړوي.

ښاغلی حنفي ټینګار کوي چې په هېواد کې د کرنې د ودې لپاره بندونه او د اوبو کانالونه جوړوي.

د ریاست الوزرا اداري مرستیال، عبدالسلام حنفي و ویل: « اوس هم د زراعت وزارت، د کلیو د پراختیا وزارت، او د اوبو او انرژۍ وزارتونو هر یوه ته  شاوخوا ۱۴۰ چک پاینټونه ورکړل شوي تر څو د درې میاشتو په لړ کې یې جوړ کړي.»

بلخوا، د ریاست الوزار اقتصادي مرستیال هم وایي، چې د هېواد ۶۸ سلنه خواړه له کرنیزو محصلاتو ترلاسه کیږي.

ملا عبدالغني برادر له ټولو دولتي ادارو غواړي چې له کرنیزو محصلاتو ګټه واخلي.

د ریاست الوزرا اقتصادي مرستیال، ملا عبدالغني برادر په دغه نندارتون کې و ویل: « د هېوادوالو د توان لپاره د ټولو دولتي ادارو غواړم تر څو د زراعتي محصولاتو ملاتړ وکړي او خپلې ورځنۍ اړتیاوې د کورنیو زراعتي محصولاتو پوره کړي، چې هم ویټامین لري او روغتیایي ګټې لري.»

د اسلامي امارت رییس الوزرا هم په یوه پیغام کې ویلي دي، چې اوسمهال په هېواد کې د کرنیزو محصولاتو د ودې لپاره ښه زمینه برابره شوې ده او له پانګوالو یې غوښتي، چې په دې برخه کې پانګونه وکړي.

د اسلامي امارت د ویاند مرستیال، بلال کریمي د رییس الوزرا له قوله و ویل: « دا چې اوس اشغال پای ته رسېدلی او د هېواد په ټولو برخو  کې امنیت ټینګ شوی دی، نو د کرنیزو محصولاتو د زیاتوالي لپاره ښه زمینه برابره شوی ده.»

د کرنې، اوبولګونې او مالدارۍ وزارت سرپرست، عطاءالله عمري هم په دې تړاو څرګنده کړه : « موږ پرېکړه کړې چې د افغانستان دغه جغرافیه په پنځه برخو وویشو، کرنیزې برخې کرنې ته ځانګړې کوو، د مالدارۍ برخې هم مالدارۍ ته ځانګړي کوو، سوداګریزې برخې سوداګرۍ ته ځانګړې کوو، صنعتي برخې او فابریکې هم صنعت او فابرېکو ته ځانګړې کوو او استوګنیزې برخې هم استوګنې ته ځانګړې کوو.»

د هېواد د کرنیزو محصولاتو د نهه ویشتم نندارتون ګډونوال د دغه راز نندارتونونو جوړېدل ګټور ګڼي.

ګډونوالې، سکینه عطايي و ویل: « ډېره ښه ده، ځکه ډېری ښځې نشي کولای چې دلته نشي راتلی، موږ غواړو د دوی لپاره یو مثال اوسو، تر څو راشي او په دغسې پروګرامونو کې برخه واخلي او دوکان جوړ کړي.»

دغه نندارتون څلور ورځنی دی او ګډونوالو پکې په ۲۶۳غرفو کې خپل محصولات نندارې ته اېښي دي، چې له دې منځه ۵۶ غرفې د ښځو لپاره ځانګړې شوې دي.