د ننګرهار سیمه ییز مسوولین وایي، د تېر کال پرتله سږ کال د دغه ولایت د مالټو په حاصلاتو کې ۲۵ سلنې زیاتوالی راغلی دی. 

مسووولین وایي، تېر کال د ننګرهار مالټو درې نیم زره تڼه حاصل ورکړی و چې سږ کال به دا شمېر نږدې پنځه زره ټنو ته لوړ شي.

دوی په ننګرهار کې د مالټو د زیاتوالي لامل د خصوصي سکټور له لوري د مالټو بڼونو جوړول یادوي.

د دولتي شرکتونو لوی ریاست ویاند، محمد نبي بهار و ویل: «سږ کال د مالټو حاصلاتو کې ۲۵ سلنې زیاتوالی راغلی، تېر کال زموږ د مالټو حاصلات درې نیم زره ټنه وو او سږ کال پنځه نیم زره ټنه دي او د ډېروالي لامل یې په یو شمېر سیمو کې د نورو بڼوڼو جوړول دي، چې سږ کال یې حاصلات ورکړي دي.»

بل لور ته بڼوال وایي، د تورخم لارې تړل کېدو سره یې بازار غوړېدلی او غوښتنه کوي چې ننګرهار کې د مالټو فصل تر بشپړېدو دې د تورخم لار نه پرانیستل کیږي.

ننګرهار کې بڼوال، ظاهر شاه و ویل: «که د پاکستان لاره خلاصه هم شي؛ نو د پاکستاني مالټو او کېنو راوړلو ته دې اجازه ورنه کړل شي، زموږ خپله دومره مالټې شوي چې د افغانستان ټولو برخو ته یې رسولی شو.»

ننګرهار کې د مالټو په یوه بڼ کې کارګر، عمیر خان و ویل: «موږ دلته کار کوو کله چې مالټې را ورسیږي، نو موږ مالټې را شکوو بیا یې په کارتنونو کې اچوو؛ څو خپلې کورنۍ ته یوه مړۍ حلاله ډوډۍ یوسو.»

ننګرهار کې نور بڼوال هم د خپلو بڼوڼو د مالټو حاصلاتو ته خوښ دي او هیله من دي چې سږ کال به هېواد ته له پاکستانه د مالټو وارداتو اجازه ورنه کړل شي. 

بڼوال، غازي احمدزي و ویل: «زما د دغه باغ لومړی حاصل دی چې ترلاسه کوم یې، کومه اندازه چې موږ ته ښودل شوې وه ستا باغ به څلور کاله وروسته دومره حاصل ورکوي، شکر الحمد الله هغه څخه یو په دوه چنده یې حاصلات ورکړي، خوشاله په دې یم چې خواري مې بې ځایه لاړه نه شوه، هر بڼوال او سوداګر پر دغو بڼوڼو سخت ډېر مصارف کړي دي.»

باور دا دی که په کور دننه د تولیدېدونکو مالټو د پروسیس، بسته بندۍ او صادراتو لپاره لازم امکانات برابر شي؛ نو نه یوازې په کور دننه به بڼوالو ته مناسبه ګټه ورسیږي؛ بلکې د هېواد په ملي اقتصاد کې به هم مهم رول ولوبوي.