د افغانستان څه باندې ۱۲۰۰ سوداګریز کانتینرونه د پاکستان په کراچۍ بندر کې بند پاتې دي.

د افغانستان-پاکستان د سوداګرۍ ګډه خونه وایي، دا په دغو کانتینرونو کې وارداتي خوراکي توکي شامل دي، چې د توکو د څېړنې د پڅ بهیر او د موټرو د ګڼې ګوڼې له امله په دغه بندر کې بند پاتې دي.

د افغانستان-پاکستان د سوداګرۍ د ګډې خونې رییس خان‌جان الکوزي ویلي:«اوسمهال زموږ جدي ستونزه په کراچۍ بندر کې دا ده چې له ۱۲۰۰ ډېر کانتینرونه، چې ډېری په‌کې خوراکي توکي لکه بوره او غوړي دي، بند پاتې دي. د پاکستان له حکومته زموږ غوښتنه دا ده، چې د دوی د بهرنیو چارو وزارت، لکه څنګه چې یې ژمنه کړې وه، د دغو کانتینرونو د ارزونې بهیر ګړندی کړي.»

د هند او پاکستان ترمنځ د شخړو له زیاتېدو او همداراز د ایران او اسراییل ترمنځ د وروستیو نښتو له امله د باروړونکو موټرو د تګ راتګ له زیاتېدو سره هم‌مهاله د کراچۍ بندر په لور د باروړونکو موټرو د ارزونې بهیر ورو شوی، چې دغې چارې د افغان سوداګرو لپاره نوې اندېښنې راولاړې کړې دي.

افغان سوداګر، زلمی عظیمي وايي:«د پاکستان د صنعت او سوداګرۍ وزارت د افغانستان پر ټرانزيټي مالونو محدودیتونه لګولي دي. دا محدودیتونه چې پخوا یوازې د ۵ تر ۱۰ سلنه مالونو ارزونه کېده، اوس له ۳۰ تر ۱۰۰ سلنې ته لوړ شوي دي. له همدې امله زرګونه کانتینرونه د کراچۍ په بندر کې بند پاتې دي، چې له دې ډلې شاوخوا ۱۰۰۰ تر ۱۵۰۰ پورې یې خوراکي توکي لري، او پاتې نور یې بېلابېل نور اجناس دي.»

د دغو ستونزو سربېره، د پاکستان حکومت افغان موټر چلوونکو ته خبرداری ورکړی چې د جون میاشتې له پای وروسته به یوازې هغو کسانو ته د تګ راتګ اجازه ورکړل شي چې ویزه او پاسپورټ ولري.

په همدې حال کې، ځينې افغان سوداګر د پاکستان دا پرېکړه د خپلې سوداګرۍ پر وړاندې جدي خنډ ګڼي.

په وروستیو کلونو کې د افغانستان او پاکستان ترمنځ سیاسي ترینګلتیاو د دواړو هېوادونو ترمنځ د سوداګریزو اړیکو کچه راټیټه کړې، او اقتصادي کارپوهان تل ټینګار کوي چې افغانستان باید د سوداګرۍ لپاره بدیل بازارونه پیدا کړي، چې پر یوه لار تړلتیا کمه شي.