ځینې کروندګر چې، له بېلابېلو ولایتونو یې خپل کرنیز محصولات د خرڅلاو لپاره کابل ته راوړي، د مناسب بازار له نشتوالي شکایت لري.

دوی وايي، خپل کرنیز محصولات ډېر لګښت کابل ته راوړي خو کابل کې هم ورته مناسب بازار نشته؛ نو له سختو ستونزو سره مخ شوي دي.

۶۰ کلن جان اغا چې له کندزه یې کابل ته خټکي راوړي وايي، په کښت یې تر ۵۰ زرو افغانیو زیات لګښت راغلی؛ خو په خبره یې اوس یې لګښت هم نه پوره کوي. 

جان اغا د طلوع‌نیوز خبریال ته و ویل: « د هر من خټکي د لېږد لګښت ۳۰ افغانۍ دی او اوس ۴۰ افغانۍ پلورل کیږي؛ موږ ته یوازې ۱۰ افغانۍ پاتې کیږي. لوی خټکي په ۹۰ افغانۍ پلورو او کوچني خټکي په ۴۰ افغانۍ، چې موږ ته هیڅ ګټه نه کوي.»

له کندوز کروندګر حبیب الله و ویل: « هندواڼې کابل کې ۴۰ یا ۵۰ افغانۍ پلورل کیږي چې زموږ لګښت نه پوره کوي. ډېرې ستونزې شته او د کرنې وزارت موږ ته ژمنې راکوي خو پرې عمل نه کوي.»

یو بل کروندګر محمد غیاث و ویل: « موږ د کرنیزو محصولاتو لپاره یو سالم مارکیټ نه لرو. زموږ اصلي مارکیټ باید پاکستان، تاجیکستان او ازبیکستان اوسي خو له بده مرغه دغه هېوادونه یې له موږ نه پېري. پاکستان چې له موږ پېر کوي، ستونزې شته چې ګمرکونه لوړ دي او لارې تړلې دي.»

بل لورته د کرنې اوبو لګولو او مالدارۍ وزارت وايي، هڅه کوي چې د کروندګرو لپاره اړینې اسانتیاوې او د دوی محصولاتو ته مناسب بازار ومومي.

د کرنې، اوبو لګولو او مالدارۍ وزارت ویاند، مصباح الدین مستعین و ویل: « د کرنې، اوبو لګولو او مالدارۍ وزارت له سوداګرو سره په ګډه هڅه کوي چې د کرنیزو محصولاتو د صادرولو زمینه پراخه کړي څو کروندګر وکولای شي چې د خپلو محصولاتو ډېر عاید ترلاسه کړي.»

ډېر شمېر کروندګر وایي، روان کال یې محصولاتو ته د مناسب بازار او سړو خونو د نشتون او دغه راز د ګاونډیو هېوادونو له لوري د صادراتو په برخه کې خنډونه د دې سبب شوي چې ډېر محصولات یې لمنځه لاړ شي.