د صنعت او سوداګرۍ وزارت وايي چې په تېرو پنځو میاشتو کې د ۸ مېلیون ډالرو په ارزښت ۸۰۰ ټنه جلغوزې له هېواده بهر ته صادرې شوې دي.

 د صنعت او سوداګرۍ وزارت شمېرې ښيي، چې دغه جلوزې  پاکستان، چین، متحده عربي اماراتو او ځینو نورو هېوادونو ته صادر کړل شوي دي.

د دغه وزارت ویاند ډاډ ورکوي، چې د صادراتو د زیاتېدو لپاره هڅې روانې دي.

د صنعت او سوداګرۍ وزارت ویاند اخندزاده عبدالسلام جواد وویل:«له نېکه مرغه موږ له چین، متحده عربي اماراتو او ځينو نورو هېوادونو او همدارنګه له روسیې سره مستقیماً وصل یوو او تر ډېره هوايي لارو او بندرونو له لارې وصل یوو.» 

بلخوا، ځينې سوداګر وایي، د توکو په تېره بیا د ځلغوزو د صادراتو د زیاتېدو لپاره اړتیا ده، چې اسلامي امارت یې ستونزې حل کړي.

سوداګر محبوب الله محمدي وايي:«له افغانستانه د هوايي کارګو بیه ډېره لوړه ده البته دلته حکومت باید د سبسایډۍ پروګرامونه په پام کې ونیسي، دویمه دا چې هغه ستونزې چې اوس د حکومت له خوا په ځنګلونو کې پر سوداګرو اضافه شوې دي چې د ځنګلونو محصولات له عشر سره دی البته دا موضوع هم پر بیې او صادراتو اغېزه کوي.»

اخوا، د سوداګرۍ او پانګونې خونه وایي که‌چېرې اسانتیاوې برابرې شي، سوداګر کولای په یوه کال کې د سل مېلیون ډالرو په ارزښت ډېر ځلغوزې صادرې کړي او له دې پلوه به اسلامي امارت هم ښه عاید ترلاسه کړي.

د سوداګرۍ او پانګونې خونې لومړی مرستیال محمد یونس مومند څرګندوي:«د کال موږ کابو ۷۵ مېلیون ډالره صادرات لرو که‌چېرې دا په ښه بڼه یې پروسس کړو او زموږ پروسس همدا ډول دوام پیدا کړي کولای شو د صادراتو کچه تر ۱۰۰ مېلیونو ډالرو ورسوو.»

د صنعت او سوداګرۍ وزارت د شمېرو له مخې، په ۱۴۰۱ لمریز کال کې بهر ته د ۴۹ مېلیون ‌ډالرو په ارزښت ځلغوزې صادرې شوې دي، چې ډېری دغه صادرات پاکستان چین او هند ته شوي دي.

ویډيو: د پکتيا د کرنې رياست له لوري د لرګيو بار شاوخوا ۲۵۰ بار وړونکې لارۍ درول شوې دي. موټرو چلوونکي وايي له تېرو پنځو مياشتو راهيسي يې بېلابېلې دروازې ټکولي؛ خو چا يې غږ نه دی اورېدلی.