په افغانستان کې د چین سفیر جاوشینګ د پروان ولایت د باریک اب صنعتي پارک د لیدو پر مهال په دغه هېواد کې، د خصوصي سکتور او پانګونې پر ودې ټینګار کړی دی.

د چین سفیر د کتنې پر مهال ویلي چې، په افغانستان په ځانګړې توګه په دغه پارک کې د پانګونې لپاره ښه فرصتونه موجود دي.

جاوشینګ وايي:«له بېخ بینايي پروژو ملاتړ ډېر مهم دی، د اقتصادي ودې او خوندي امنیتي وضعیت ته په کتو ډېره زمینه مساعده ده چې، موږ وکولای شو چینايي پانګوال جذب کړو چې، افغانستان ته د کار او پانګونې لپاره راشي.»

 د چین سفیر سربېره، د ملګرو ملتونو بشري مرستو همغږي کوونکی او د ځینو نورو نړۍوالو بنسټونو مسوولانو د خصوصي سکتور ملاتړ، اقتصادي بنسټونو او تولیدي شرکتونو برېښنا کمښت ستونزو ته د رسېدنې په موخه د پروان له باریک آب صنعتي پارک څخه لیدنه وکړه.

د افغانستان لپاره د ملګرو ملتونو بشري مرستو همغږي کوونکی انډریکا راټواته وايي:«که موږ وغواړو په افغانستان کې تلپاتي ثبات ولرو، د خصوصي سکتور له لارې دې موخې ته رسېدای شو او موږ چمتو يو چې، افغانستان کې له خصوصي سکتوره ملاتړ وکړو.»

د صنعت او سوداګرۍ وزارت مرستیال وايي، په کور دننه د پانګونې لپاره ښه زمینه برابره ده او د پانګوالو لپاره د فرصتونو برابرولو او د هېواد صنعتي پارکونو ستونزو ته د رسېدنې ډاډ ورکوي.

د صنعت او سوداګرۍ وزارت مرستیال احمدالله زاهد طلوع‌نیوز ته وايي:«په افغانستان کې د پانګونې لپاره اوس ښه زمینه برابره ده، امنیت تامین دی، هرڅوک کولای شي چې، په افغانستان کې په هره برخه کې پانګونه وکړي.»

د برېښنا شرکت اجرايي رییس عبدالباري عمر هم څرګندوي:«موږ دغه پارک ته دم‌ګړۍ د ۱۰ مېګاواټه له ظرفیت سره برېښنا ورکړې او پروژې تر لاس لاندې دي، ان‌شاالله وکړای شو چې، ټولو صنعتي پارکونو ته په ځانګړې توګه د مرکز ټولو پارکونو ته ښه برېښنا ورکړای شو.»

پروان کې د یوې تولیدي کارخونې مسوول شهاب‌ قناویزیان وویل:«بنسټیزه ستونزه چې، دم‌ګړۍ ټول شرکتونه، په ځانګړې توګه د باریک اب په صنعتي پارکونو کې د سوپر کولا شرکت ورسره مخ دی، د برېښنا ستونزه ده.»